Pechowy Karlik

[Kayha]

Romboł górnik klocek, romboł go pod ścianom
I przi tym rombaniu piznoł sie w kolano
Że go zaskoczyło to nogłe zdarzynie
Na wcześniejszy wyjazd dostoł pozwolynie.
Poszoł se przykopym, jak mamlas po szynach
A tu na zakryncie dup w niego maszyna

Kieby sie obejrzoł za siebie do zadku
To by boł uniknoł przikrego wypadku.
Stanoł i nadepnoł na kulok urżniynty
I gwość zaruściały wloz mo aż do piynty
Musioł borok siednońć na okorków kupie
Zaroz poczuł drzizga w swojyj chudyj dupie.

Górnik aże skoczył, hełm mu ślecioł z gowy
I ciulnoł tom glacom w ring od obudowy.
Buła mu wylazła na pośrodku glacy
Stracił równowaga i ciulnoł na cacy.
Jak lecioł na plecy, chycił za kolejka
Palec mu prziczasła jakoś ku..a belka

Chycił za betonik, kiery wisioł z kraja
Betonik wylecioł i dostoł nim w jaja.
Droty co tyczały, wlazły mu do miecha
Trza mieć ku..a noga pierońskiego pecha
Jeszcze zdonżył chycić jakoś deska z tyłu
Półka go prziczasła i ćwierć tony pyłu.

Godajom wypadki, niy chodzom parami
Jak to jest naprowda słyszeliście sami
Tak jest niebezpieczno robota górnika
Niy rób nic na dole - unikniesz ryzyka